ಪತಂಗ ಚಿತ್ರ ಸಂಚಯ

ಚಿಟ್ಟೆಗಳು ತಮ್ಮ ಬಣ್ಣಗಳಿಂದ ಎಲ್ಲರ ಗಮನ ಸೆಳೆದರೆ, ಪತಂಗಗಳು ರಾತ್ರಿಯ ಕತ್ತಲಿನಲ್ಲಿಯೇ ತಮ್ಮದೇ ಆದ ಅಧ್ಬುತ ಲೋಕವನ್ನು ಕಟ್ಟಿಕೊಂಡಿವೆ. ಆದರೆ ವೈವಿಧ್ಯತೆಯ ವಿಷಯಕ್ಕೆ ಬಂದರೆ, ಅವು ಚಿಟ್ಟೆಗಳಿಗಿಂತಲೂ ಬಹಳ ಮುಂದಿವೆ. ಜಗತ್ತಿನಲ್ಲಿ ಸುಮಾರು 1,60,000ಕ್ಕೂ ಹೆಚ್ಚು ಪತಂಗಗಳ ಪ್ರಭೇದಗಳು ದಾಖಲಾಗಿದ್ದರೆ, ಭಾರತದಲ್ಲೇ 12,000ಕ್ಕೂ ಹೆಚ್ಚು ಪ್ರಭೇದಗಳು ಕಂಡುಬಂದಿವೆ. ಲೆಪಿಡೋಪ್ಟೆರಾಗಳ (ಚಿಟ್ಟೆ ಮತ್ತು ಪತಂಗಗಳು) ಒಟ್ಟು ಪ್ರಭೇದಗಳಲ್ಲಿ ಸುಮಾರು 90% ಪತಂಗಗಳೇ.

ಸೂಜಿಯ ತುದಿಯಷ್ಟೇ ಚಿಕ್ಕದಾದ ಸೂಕ್ಷ್ಮ ಪತಂಗಗಳಿಂದ ಹಿಡಿದು, ಸುಮಾರು 25–30 ಸೆಂ.ಮೀ. ರೆಕ್ಕೆವಿಸ್ತಾರ ಹೊಂದಿರುವ ಅಟ್ಲಾಸ್ ಪತಂಗದವರೆಗೆ ಅವುಗಳ ಗಾತ್ರದಲ್ಲಿ ಅಪಾರ ವೈವಿಧ್ಯತೆ ಇದೆ. ಕೆಲವು ಹೂಗಳ ಮಕರಂದವನ್ನು ಹೀರುತ್ತವೆ; ಕೆಲವು ಮಾಗಿದ ಹಣ್ಣುಗಳ ರಸವನ್ನು ಕುಡಿಯುತ್ತವೆ; ಕೆಲವು ಮರಗಳಿಂದ ಸೋರುವ ರಸವನ್ನು ಸೇವಿಸುತ್ತವೆ. ಮತ್ತೂ ಕೆಲವು ವಯಸ್ಕ ಹಂತದಲ್ಲಿ ಆಹಾರವನ್ನೇ ಸೇವಿಸುವುದಿಲ್ಲ. ಕೆಲವು ಪತಂಗಗಳು ಜೇನುನೊಣಗಳಂತೆ ಪರಾಗಸ್ಪರ್ಶದಲ್ಲೂ ಪ್ರಮುಖ ಪಾತ್ರವಹಿಸಿದರೆ, ಇನ್ನು ಕೆಲವು ಕಪ್ಪೆಗಳು, ಬಾವಲಿಗಳು, ಹಕ್ಕಿಗಳು ಮತ್ತು ಇತರ ಜೀವಿಗಳಿಗೆ ಆಹಾರವಾಗುವ ಮೂಲಕ ಆಹಾರ ಸರಪಳಿಯ ಪ್ರಮುಖ ಕೊಂಡಿಗಳಾಗಿವೆ.

ಪತಂಗಗಳ ಬಣ್ಣ ಮತ್ತು ವಿನ್ಯಾಸವೂ ಅಷ್ಟೇ ಕುತೂಹಲಕರ. ಕೆಲವು ಮರದ ತೊಗಟೆಯಂತೆ ಕಾಣುತ್ತವೆ; ಕೆಲವು ಒಣ ಎಲೆಗಳಂತೆ ಮರೆಮಾಚಿಕೊಳ್ಳುತ್ತವೆ; ಕೆಲವು ಹಕ್ಕಿಯ ಹಿಕ್ಕೆಯನ್ನೇ ಹೋಲುತ್ತವೆ. ಇನ್ನೂ ಕೆಲವು ತಮ್ಮ ರೆಕ್ಕೆಗಳ ಮೇಲಿರುವ ದೊಡ್ಡ ಕಣ್ಣಿನಂತಹ ಗುರುತುಗಳಿಂದ ಬೇಟೆಗಾರರನ್ನು ಬೆದರಿಸುತ್ತವೆ. ಇವೆಲ್ಲವೂ ಲಕ್ಷಾಂತರ ವರ್ಷಗಳ ವಿಕಾಸದ ವಿಕಾಸದ ಪರಿಣಾಮವಾಗಿ ರೂಪುಗೊಂಡ ಅಧ್ಬುತ ಹೊಂದಾಣಿಕೆಗಳು.

ರಾಷ್ಟ್ರೀಯ ಪತಂಗ ವಾರ (National Moth Week) ವಿಶ್ವದಾದ್ಯಂತ ಪ್ರತಿವರ್ಷ ಜುಲೈ ತಿಂಗಳ ಕೊನೆಯ ವಾರದಲ್ಲಿ ಆಚರಿಸಲಾಗುತ್ತದೆ. ಪತಂಗಗಳ ವೈವಿಧ್ಯತೆ, ಅವುಗಳ ಪರಿಸರದ ಮಹತ್ವ ಮತ್ತು ಅವುಗಳ ಕುರಿತು ವೈಜ್ಞಾನಿಕ ಮಾಹಿತಿಯನ್ನು ಜನರಿಗೆ ಪರಿಚಯಿಸುವ ಉದ್ದೇಶದಿಂದ 2012ರಲ್ಲಿ ಈ ಅಭಿಯಾನ ಆರಂಭವಾಯಿತು. ಇಂದು ಇದು 90ಕ್ಕೂ ಹೆಚ್ಚು ದೇಶಗಳಲ್ಲಿ ನಡೆಯುವ ಜಾಗತಿಕ ಸಮುದಾಯ ವಿಜ್ಞಾನ (Citizen Science) ಕಾರ್ಯಕ್ರಮವಾಗಿ ಬೆಳೆದಿದ್ದು, ಸಾವಿರಾರು ಪ್ರಕೃತಿ ಪ್ರೇಮಿಗಳು ತಮ್ಮ ಪ್ರದೇಶದಲ್ಲಿ ಕಂಡುಬರುವ ಪತಂಗಗಳನ್ನು ದಾಖಲಿಸಿ ವಿಜ್ಞಾನಿಗಳಿಗೆ ಅಮೂಲ್ಯ ಮಾಹಿತಿಯನ್ನು ಒದಗಿಸುತ್ತಿದ್ದಾರೆ.

ಪತಂಗಗಳು ಎಲ್ಲೆಲ್ಲೂ ಇವೆ. ರಾತ್ರಿ ದೀಪದ ಬೆಳಕಿಗೆ ನಿಮ್ಮ ಮನೆಗಳಿಗೂ ಬರುತ್ತಿರಬಹುದು. ಸ್ವಲ್ಪ ಗಮನ ಹರಿಸಿ ನೋಡಿದರೆ, ರಂಗುರಂಗಿನ ಚಿತ್ತಾರಗಳಿಂದ ಕೂಡಿದ ಪತಂಗಗಳನ್ನು ನೀವಿದ್ದಲ್ಲಿಯೇ ಕಾಣಬಹುದು. ಈಗಂತೂ ಬಹುತೇಕ ಎಲ್ಲರ ಕೈಯಲ್ಲೂ ಮೊಬೈಲ್ ಇದೆ. ಒಂದು ಚಿತ್ರ ಕ್ಲಿಕ್ಕಿಸಿ, ಅದನ್ನು ಹಿಗ್ಗಿಸಿ ನೋಡಿ. ಆಗ ನಿಮ್ಮ ಕಣ್ಣೆದುರು ಬಣ್ಣಗಳ ಮತ್ತು ವಿನ್ಯಾಸಗಳ ಅದ್ಭುತ ಲೋಕವೇ ತೆರೆದುಕೊಳ್ಳುತ್ತದೆ.

ಸಾಧ್ಯವಾದರೆ, ಸಮುದಾಯ ವಿಜ್ಞಾನ ಯೋಜನೆಯ ಭಾಗವಾಗಿ 'ನ್ಯಾಷನಲ್ ಜಿಯೋಗ್ರಫಿಕ್' ಮತ್ತು 'ಕ್ಯಾಲಿಫೋರ್ನಿಯಾ ಅಕಾಡೆಮಿ ಆಫ್ ಸೈನ್ಸಸ್' ಸಹಯೋಗದಲ್ಲಿ ಅಭಿವೃದ್ಧಿಪಡಿಸಲಾದ iNaturalist ವೇದಿಕೆಯಲ್ಲಿ ನೀವು ತೆಗೆದ ಛಾಯಾಚಿತ್ರಗಳನ್ನು ದಾಖಲಿಸಿ. ಈ ವೇದಿಕೆ ಪತಂಗಗಳೂ ಸೇರಿದಂತೆ ನಾವು ಕಂಡ ಪ್ರಾಣಿ, ಪಕ್ಷಿ, ಕೀಟ, ಸರಿಸೃಪ, ಉಭಯವಾಸಿ, ಸಸ್ಯ ಸೇರಿದಂತೆ ಯಾವುದೇ ಜೀವಿಯನ್ನು ಗುರುತಿಸಲು ನೆರವಾಗುತ್ತದೆ.

ನೀವು ಮಾಡಬೇಕಾದದ್ದು ತುಂಬಾ ಸರಳ. ನೀವು ಕಂಡ ಜೀವಿಯ ಒಂದು ಸ್ಪಷ್ಟವಾದ ಛಾಯಾಚಿತ್ರವನ್ನು ತೆಗೆದು iNaturalistನಲ್ಲಿ ಅಪ್‌ಲೋಡ್ ಮಾಡಿದರೆ ಸಾಕು. ಜಗತ್ತಿನ ವಿವಿಧ ಭಾಗಗಳಲ್ಲಿರುವ ಅನುಭವಿ ಪ್ರಕೃತಿ ವೀಕ್ಷಕರು ಮತ್ತು ತಜ್ಞರು ಅದನ್ನು ಪರಿಶೀಲಿಸಿ, ಆ ಜೀವಿಯ ಗುರುತನ್ನು ತಿಳಿಸಲು ಸಹಾಯ ಮಾಡುತ್ತಾರೆ. ಈ ವೇದಿಕೆಯ ಮೊಬೈಲ್ ಫೋನ್ ಅಪ್ಲಿಕೇಶನ್ ಸಹಾ ಲಭ್ಯವಿದ್ದು ಆಂಡ್ರಾಯ್ಡ್ ಮತ್ತು ಐಫೋನ್ ಎರಡರಲ್ಲೂ ಕೆಲಸ ಮಾಡುತ್ತದೆ.

ಪತಂಗಗಳು ಸೊಳ್ಳೆ, ಜಿರಳೆಗಳಂತೆ ಉಪದ್ರವ ಕೊಡುವ ಜೀವಿಗಳಲ್ಲ. ಅವು ಕಚ್ಚುವುದಿಲ್ಲ, ವಿಷಕಾರಿಯೂ ಅಲ್ಲ. ನಿಮ್ಮ ಮನೆಯ ಯಾವುದೇ ವಸ್ತುವನ್ನು ಹಾಳು ಮಾಡುವುದಿಲ್ಲ. ರಾತ್ರಿ ನೀವು ಉರಿಸುವ ದೀಪದ ಬೆಳಕಿಗೆ ದಾರಿ ತಪ್ಪಿ ನಿಮ್ಮ ಮನೆಗೆ ಬಂದಿರಬಹುದು. ಆ ಒಂದು ರಾತ್ರಿ ನಿಮ್ಮ ಮನೆಯ ಗೋಡೆಯ ಮೇಲೆಯೇ ವಿಶ್ರಾಂತಿ ಪಡೆದು, ಮರುದಿನ ಮತ್ತೆ ತನ್ನ ಪಯಣವನ್ನು ಮುಂದುವರಿಸಬಹುದು. ಅವುಗಳಿಗೂ ಈ ಭೂಮಿಯಲ್ಲಿ ಬದುಕುವ ಹಕ್ಕಿದೆ. ಆದ್ದರಿಂದ, ಅವುಗಳಿಗೆ ಸ್ವಲ್ಪ ಜಾಗ, ಸ್ವಲ್ಪ ಸಮಯ ನೀಡಿ.

2026ರ ರಾಷ್ಟ್ರೀಯ ಪತಂಗ ವಾರವನ್ನು ಜುಲೈ 18ರಿಂದ 26ರವರೆಗೆ ಆಚರಿಸಲಾಗುತ್ತಿದೆ. ಕಳೆದ ಜುಲೈ 18ರಿಂದ ಎಂಟು ದಿನಗಳಲ್ಲಿ ನಾನು ಕಂಡ ಕೆಲವು ಪತಂಗಗಳ ಮತ್ತು ಜಗತ್ತಿನ ಕೆಲವು ಕುತೂಹಲಕರ ಪತಂಗಗಳ ಕಥೆಗಳನ್ನು ಹಂಚಿಕೊಂಡೆ. ಈ ಕೊನೆಯ ಕಂತಿನಲ್ಲಿ, ನಾನು ಸೆರೆಹಿಡಿದಿರುವ ಕೆಲವು ಪತಂಗಗಳ ಚಿತ್ರಗಳನ್ನು ನಿಮ್ಮೊಂದಿಗೆ ಹಂಚಿಕೊಳ್ಳುತ್ತಿದ್ದೇನೆ. ಪ್ರತಿಯೊಂದು ಚಿತ್ರದಲ್ಲಿನ ಪತಂಗವೂ ಒಂದು ಜೀವಿಯಷ್ಟೇ ಅಲ್ಲ, ಪ್ರಕೃತಿಯ ಲಕ್ಷಾಂತರ ವರ್ಷಗಳ ವಿಕಾಸದ ಕಥೆಯನ್ನು ಹೇಳುವ ಒಂದು ಪುಟ್ಟ ಕಿಟಕಿಯಾಗಿದೆ.

ಈ ಚಿತ್ರಗಳಲ್ಲಿರುವ ಪ್ರತಿಯೊಂದು ಪತಂಗದ ವೈಜ್ಞಾನಿಕ ಹೆಸರು ಮತ್ತಿತರ ವಿವರಗಳನ್ನು ನೆನಪಿಟ್ಟುಕೊಳ್ಳುವ ಅಗತ್ಯವಿಲ್ಲ. ಬಣ್ಣ, ವಿನ್ಯಾಸ ಮತ್ತು ಸೌಂದರ್ಯ ಇವುಗಳನ್ನು ಮಿಳಿತವಾಗಿಸಿ ಪ್ರಕೃತಿ ಸೃಷ್ಟಿಸಿದ ಈ ಸುಂದರ ಕಾಲಾಕೃತಿಗಳನ್ನು ನೋಡಿ ಆಸ್ವಾದಿಸಿ.

Hawk Moth (Sphingidae) ಕುಟುಂಬಕ್ಕೆ ಸೇರಿದ Lucas's Hawkmoth - Theretra lucasii ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Hawk Moth (Sphingidae) ಕುಟುಂಬಕ್ಕೆ ಸೇರಿದ ನಿಂಫಾ ಹಾಕ್ ಪತಂಗ Marumba nympha ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Hawk Moth (Sphingidae) ಕುಟುಂಬಕ್ಕೆ ಸೇರಿದ Green Pergesa Hawkmoth - Pergesa acteus ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Hawk Moth (Sphingidae) ಕುಟುಂಬಕ್ಕೆ ಸೇರಿದ Cinnamon Gliding Hawkmoth - Ambulyx moorei ಭೇದದ ಪತಂಗ. ಚಿತ್ರ: © ಶ್ರೀಕಾಂತ

Hawk Moth (Sphingidae) ಕುಟುಂಬಕ್ಕೆ ಸೇರಿದ Rhagastis aurifera ಭೇದದ ಪತಂಗ. ಚಿತ್ರ: © ಶ್ರೀಕಾಂತ

Crambidae ಕುಟುಂಬಕ್ಕೆ ಸೇರಿದ Nevrina procopia ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Crambidae ಕುಟುಂಬಕ್ಕೆ ಸೇರಿದ Aetholix ಜೀನಸ್‌ನ ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Crambidae ಕುಟುಂಬಕ್ಕೆ ಸೇರಿದ Eoophyla conjunctalis ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Crambidae ಕುಟುಂಬಕ್ಕೆ ಸೇರಿದ Cotton Leaf Roller - Haritalodes derogata ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Crambidae ಕುಟುಂಬಕ್ಕೆ ಸೇರಿದ Pygospila costiflexalis ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Crambidae ಕುಟುಂಬಕ್ಕೆ ಸೇರಿದ Hawaiian Beet Webworm Moth - Spoladea recurvalis ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Crambidae ಕುಟುಂಬಕ್ಕೆ ಸೇರಿದ Asian Tear Sucker - Botyodes asialis ಪ್ರಭೇದದ ಪತಂಗ. ಚಿತ್ರ: © ಶ್ರೀಕಾಂತ

Erebidae ಕುಟುಂಬಕ್ಕೆ ಸೇರಿದ White-barred Owl Moth - Erebus hieroglyphica ಪ್ರಭೇದದ ಪತಂಗ. ಇದರ ಮೇಲಿನ ಕಣ್ಣುಗಳು ಗೂಬೆಯ ಕಣ್ಣುಗಳನ್ನು ಹೋಲುವುದರಿಂದ ಇದನ್ನು Owl Moth ಎಂದೂ ಕರೆಯಲಾಗುತ್ತದೆ. ಚಿತ್ರ: © ಶ್ರೀಕಾಂತ