ಹಣ್ಣಿನ ಮೇಲಿದ್ದ ಹಸಿರು ಅತಿಥಿ

ಸೀಬೆ ಹಣ್ಣಿನ ಮೇಲೆ ಕುಳಿತು ರಸ ಹೀರುತ್ತಿರುವ ಪತಂಗ

 

ಉಭಯವಾಸಿಗಳ ಸಮೀಕ್ಷೆಗಾಗಿ ರಾತ್ರಿ ಅಲೆದಾಡುತ್ತಿದ್ದಾಗಲೇ ಕೆಲವೊಮ್ಮೆ ಅನಿರೀಕ್ಷಿತ ಭೇಟಿಗಳು ಸಂಭವಿಸುತ್ತಿತ್ತು. ನಮ್ಮ ಗಮನ ಕಪ್ಪೆ, ಅಥವಾ ಹಾವಿನ ಮೇಲೆ ಇದ್ದರೂ, ಕೆಲವೊಮ್ಮೆ ದಾರಿಯ ಬದಿಯ ಮರಗಳೂ ಒಂದೊಂದು ಕಥೆಯನ್ನು ಹೇಳುತ್ತಿದ್ದವು.

ಕೊಡಗಿನಲ್ಲಿ ಕೆಲಸ ಮಾಡುತ್ತಿದ್ದ ದಿನಗಳಲ್ಲೊಂದು ರಾತ್ರಿ, ಸೀಬೆಮರದ ಬಳಿ ಹಾದು ಹೋಗುತ್ತಿದ್ದಾಗ ಹಣ್ಣಿನ ಮೇಲೆ ಕುಳಿತಿದ್ದ ಜೀವಿಯೊಂದು ಕಣ್ಣಿಗೆ ಬಿತ್ತು. ಮೊದಲ ನೋಟಕ್ಕೆ ಅದು ಎಲೆಯೇ ಇರಬಹುದೆಂದು ಅನಿಸಿತು. ಹತ್ತಿರ ಹೋಗಿ ಬೆಳಕು ಚೆಲ್ಲಿದಾಗ ಅದು ಒಂದು ಸುಂದರ ಪತಂಗ ಎಂಬುದು ಗೊತ್ತಾಯಿತು. ಯಾವ ಪ್ರಭೇದ ಎಂಬುದು ಮಾತ್ರ ತಿಳಿದಿರಲಿಲ್ಲ. ಅದರ ಚಿತ್ರ ತೆಗೆದುಕೊಂಡು, ಮೊಬೈಲ್ ಜಾಲದ ಸಂಪರ್ಕ ಸಿಕ್ಕ ನಂತರ ಹುಡುಕಿದಾಗ ಅದರ ಹೆಸರು ತಿಳಿಯಿತು—Green Fruit-piercing Moth (Eudocima salaminia). ಹೆಸರನ್ನು ಓದಿದ ಕ್ಷಣವೇ ನಗು ಬಂತು. ಏಕೆಂದರೆ ನಾನು ಅದನ್ನು ಮೊದಲು ಕಂಡದ್ದೇ ಹಣ್ಣಿನ ಮೇಲೆಯೇ ಕುಳಿತು ರಸ ಹೀರುತ್ತಿದ್ದಾಗ!

ಈ ಪತಂಗದ ಜೀವನವೇ ಹಣ್ಣುಗಳೊಂದಿಗೆ ಬೆಸೆದುಕೊಂಡಿದೆ. ತನ್ನ ಬಲವಾದ Proboscisನಿಂದ (ಚಿಟ್ಟೆ, ಪತಂಗಗಳಲ್ಲಿರುವ ಉದ್ದವಾದ ಹೀರುಗೊಳವೆ) ಮಾಗಿದ ಹಣ್ಣುಗಳ ಸಿಪ್ಪೆಯನ್ನು ಚುಚ್ಚಿ ಒಳಗಿನ ರಸವನ್ನು ಹೀರುತ್ತದೆ. ಸೀಬೆ, ಮಾವು, ಕಿತ್ತಳೆ, ಮೋಸಂಬಿ, ಬಾಳೆ, ಪಪ್ಪಾಯಿ, ದಾಳಿಂಬೆ, ದ್ರಾಕ್ಷಿ, ಸೇಬು, ಸಪೋಟಾ, ಟೊಮೇಟೊ ಹೀಗೆ ಹಲವಾರು ತೋಟದ ಬೆಳೆ ಮತ್ತು ಕಾಡು ಹಣ್ಣುಗಳು ಇದರ ಆಹಾರ. 

ಇದರ ಬಣ್ಣಗಳ ಸಂಯೋಜನೆಯೇ ಇನ್ನೊಂದು ಅಚ್ಚರಿ. ಮುಂಭಾಗದ ರೆಕ್ಕೆಗಳು ಹಸಿರು ಎಲೆಯಂತಿದ್ದು, ಅದರ ಮೇಲಿರುವ ಕಂದು, ಬೂದು ಮತ್ತು ಬಿಳಿ ಗೆರೆಗಳು ಎಲೆಯ ಮೇಲಿನ ಗೆರೆಗಳನ್ನು ನೆನಪಿಸುತ್ತವೆ. ಹಗಲಿನಲ್ಲಿ ರೆಕ್ಕೆ ಮಡಚಿಕೊಂಡು ಕುಳಿತಾಗ ಇದು ಮರದ ಎಲೆಗಳ ಮಧ್ಯೆ ಸಂಪೂರ್ಣ ಮರೆಯಾಗುತ್ತದೆ. ಆದರೆ ಹಾರುವ ಕ್ಷಣದಲ್ಲಿ ಮಾತ್ರ ಅದರ ಒಳರೆಕ್ಕೆಗಳ ಹೊಳೆಯುವ ಕಿತ್ತಳೆ-ಹಳದಿ ಬಣ್ಣ, ಅದರ ಮೇಲಿನ ಕಪ್ಪು ಪಟ್ಟೆಗಳೊಂದಿಗೆ ಮಿಂಚಿನಂತೆ ಕಣ್ಣಿಗೆ ಬೀಳುತ್ತದೆ. ಕ್ಷಣಕಾಲ ಬೇಟೆಗಾರರನ್ನು ಬೆಚ್ಚಿಬೀಳಿಸಿ, ತಾನು ಸುರಕ್ಷಿತವಾಗಿ ಹಾರಿಹೋಗುತ್ತದೆ. ಮತ್ತೆ ಎಲ್ಲೋ ಕುಳಿತ ಕೂಡಲೇ ಆ ಬಣ್ಣಗಳೆಲ್ಲ ಮಾಯವಾಗಿ, ಮತ್ತೊಮ್ಮೆ ಒಂದು ಸಾಮಾನ್ಯ ಎಲೆಯಂತೆ ಕಾಣುತ್ತದೆ.

ಈ ಪತಂಗ ಹಣ್ಣನ್ನು ಚುಚ್ಚಿದ ಜಾಗದಿಂದ ಶಿಲೀಂಧ್ರಗಳು ಮತ್ತು ಬ್ಯಾಕ್ಟೀರಿಯಾಗಳು ಪ್ರವೇಶಿಸಿ ಹಣ್ಣು ಕೊಳೆಯುವ ಕಾರಣ, ತೋಟಗಾರರ ದೃಷ್ಟಿಯಲ್ಲಿ ಇದು ಒಂದು ಉಪದ್ರಕಾರಿ ಕೀಟ. ಭಾರತ ಸೇರಿದಂತೆ ಆಗ್ನೇಯ ಏಷ್ಯಾದಾದ್ಯಂತ ಕಂಡುಬರುವ ಈ ಪತಂಗ ಅಪರೂಪದ್ದಲ್ಲ. ಆದರೂ ನಿಶಾಚರ ಸ್ವಭಾವ ಮತ್ತು ಅದ್ಭುತವಾಗಿ ಮರೆಯಾಗುವ ಸಾಮರ್ಥ್ಯದಿಂದಾಗಿ ಹೆಚ್ಚಿನ ಜನರ ಕಣ್ಣಿಗೆ ಬೀಳುವುದಿಲ್ಲ. ಪ್ರಕೃತಿಯಲ್ಲಿ ಕೆಲವೊಂದು ಜೀವಿಗಳು ತಮ್ಮ ಸೌಂದರ್ಯವನ್ನು ಎಲ್ಲರಿಗೂ ತೋರಿಸುವುದಿಲ್ಲ. ಸರಿಯಾದ ಸಮಯದಲ್ಲಿ, ಸರಿಯಾದ ಸ್ಥಳದಲ್ಲಿರುವವರಿಗೆ ಮಾತ್ರ ತಮ್ಮನ್ನು ಪರಿಚಯಿಸಿಕೊಳ್ಳುತ್ತವೆ. ಈ ಪತಂಗವೂ ಅಂತಹ ಜೀವಿಗಳಲ್ಲೊಂದು.