ಒಂದು ಕೂಗು, ಹಲವು ಕಾಡುಗಳು

ಪೂರ್ವ ಘಟ್ಟದ ಕಾಡುಗಳಲ್ಲಿ ಕಂಡ Indian Scops-Owl

ಕೆಲವು ಪಕ್ಷಿಗಳ ಕೂಗುಗಳು ಆಳವಾಗಿ ನೆನಪಿನಲ್ಲಿ ಉಳಿದುಬಿಡುತ್ತವೆ.

2025ರ ಅಕ್ಟೋಬರ್ ತಿಂಗಳ ಒಂದು ಸಂಜೆ ಪಾಲಕ್ಕಾಡಿನಲ್ಲಿ ನಾನು ಉಳಿದುಕೊಂಡಿದ್ದ ಮನೆಯ ಮುಂದೆ ಕುಳಿತಿದ್ದೆ. ಆ ಮನೆಯ ಮುಂದೆ ಕೃಷಿ ನೀರಾವರಿಗೆಂದು ಮಾಡಿದ ದೊಡ್ಡದೊಂದು ಕಾಲುವೆ ಮತ್ತು ಅದರ ಆಚೆಗೆ ಒಂದು ಚಿಕ್ಕ ಕಾಡಿತ್ತು. ಅದರ ಆಚೆಗೆ ಸ್ವಲ್ಪ ಕೃಷಿ ಭೂಮಿ ಮತ್ತು ಅದರ ಹಿಂದೆ ದೊಡ್ಡದಾದ ಕಾಡು ಆರಂಭವಾಗುತ್ತದೆ. ಆ ಹತ್ತಿರದ ಕಾಡಿನಿಂದ Mottled Wood Owlನ ಕೂಗು ಕೇಳಿಬರುತ್ತಿತ್ತು. ಆ ಕೂಗನ್ನು ಕೇಳಿದೊಡನೆ ಬೇರೆ ಬೇರೆ ಗೂಬೆಗಳ ಕೂಗುಗಳು ಒಂದೊಂದಾಗಿ ನೆನಪಿಗೆ ಮೂಡತೊಡಗಿತು.

2023ರಲ್ಲಿ ಆಂಧ್ರಪ್ರದೇಶದ ನಾಗಾರ್ಜುನಸಾಗರ–ಶ್ರೀಶೈಲಂ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಕೆಲಸ ಮಾಡುವಾಗ ನಾನು ಮತ್ತು Ng ಕೃಷ್ಣಾ ನದಿಯ ದಡದಲ್ಲಿ ಟೆಂಟ್ ಹಾಕಿಕೊಂಡು ವಾಸಿಸುತ್ತಿದ್ದೆವು. ಲೈನ್ ಟ್ರಾನ್ಸೆಕ್ಟ್ ಸಮೀಕ್ಷೆ ನಡೆಯುತ್ತಿತ್ತು. ನಮ್ಮ ಜೊತೆಗೆ ಇನ್ನಿಬ್ಬರು ಫೀಲ್ಡ್ ಅಸಿಸ್ಟೆಂಟ್‌ಗಳಿದ್ದರು.

ಒಂದು ಸಂಜೆ ಸಮೀಕ್ಷೆ ಮುಗಿಸಿ ಬಂದ ನಂತರ ಟಾರ್ಚ್ ಬೆಳಕಿನಲ್ಲಿ ಊಟ ಮಾಡುತ್ತಾ ಹೊರಗಡೆ ಕುಳಿತಿದ್ದೆವು. ದಿನವಿಡೀ ನಡೆದ ಘಟನೆಗಳ ಬಗ್ಗೆ ಮಾತನಾಡುತ್ತಿದ್ದೆವು. ಅಷ್ಟರಲ್ಲಿ ಕಾಡಿನೊಳಗಿಂದ ಒಂದು ವಿಚಿತ್ರ ಶಬ್ದ ಕೇಳಿಸಿತು. ಮೊದಲಿಗೆ ಅದು ಏನೆಂದು ಅರ್ಥವಾಗಲಿಲ್ಲ. ಯಾರೋ ನಗುತ್ತಿರುವಂತೆ ಅನಿಸುತ್ತಿತ್ತು. ಆದರೆ ಅದು ಮನುಷ್ಯನ ಧ್ವನಿ ಅಲ್ಲ. ಪ್ರಾಣಿಯ ಶಬ್ದವೂ ಅಲ್ಲ. ಕತ್ತಲಿನ ನಡುವೆ ಆ ಕೂಗು ಇನ್ನೂ ವಿಚಿತ್ರವಾಗಿ ಕೇಳಿಸುತ್ತಿತ್ತು. ಸ್ವಲ್ಪ ಹೊತ್ತಿನ ನಂತರ ಅದು Mottled Wood Owl ಎಂದು ಗೊತ್ತಾಯಿತು.

ನಾವು ಕೇಳಿದ Mottled Wood Owlನ ಕೂಗು ನಮಗೆ ಹೊಸದೇನೂ ಆಗಿರಲಿಲ್ಲ. ನಾನು ಮತ್ತು Ng ಅದನ್ನು 2012ರಲ್ಲೇ ಬಿಳಿಗಿರಿರಂಗನಬೆಟ್ಟ ಹುಲಿ ಸಂರಕ್ಷಿತ ಪ್ರದೇಶದಲ್ಲಿ ಕೇಳಿದ್ದೆವು. ಆದರೆ ಪ್ರತಿ ಕಾಡಿನಲ್ಲೂ ಅದರ ಕೂಗು ಸ್ವಲ್ಪ ಬೇರೆಯದೇ ಎನಿಸುತ್ತದೆ.

ಬಹುತೇಕ ಗೂಬೆಗಳ ಕೂಗುಗಳಲ್ಲಿ ಯಾವುದೋ ಒಂದು ನಿಗೂಢತೆ ಇರುತ್ತದೆ. ಬಹುಶಃ ಅವು ರಾತ್ರಿಯಲ್ಲಿ ಮಾತ್ರ ಚಟುವಟಿಕೆಯಾಗುವುದರಿಂದ ಇರಬಹುದು. ಅದಕ್ಕೇ ಜನರು ಅವುಗಳ ಧ್ವನಿಯನ್ನು ತಮಗೆ ಅರ್ಥವಾಗದ ಯಾವುದೋ ನಿಗೂಢ ಸಂಗತಿಗಳ ಜೊತೆ ತಳುಕು ಹಾಕಿ ನೋಡುತ್ತಾರೆ.

Spot-bellied Eagle-Owlನ ಕೂಗು ಕೇಳಿದರೆ, ಯಾರೋ ಕಾಡಿನೊಳಗೆ ಜೋರಾಗಿ ಕಿರುಚಿದಂತೆ ಅನಿಸುತ್ತದೆ. ಮೊದಲ ಬಾರಿ ಕೇಳಿದವರಿಗೆ ಖಂಡಿತ ಬೆಚ್ಚಿಬೀಳುವ ಅನುಭವ.

Oriental Scops-Owlನ ಕೂಗು ಕೇಳಿದಾಗಲೆಲ್ಲಾ ನನಗೆ 2012ರ ನಾಗರಹೊಳೆ ನೆನಪಾಗುತ್ತದೆ. ಆಗ ನಮ್ಮ ಕ್ಯಾಂಪಿನ ಸುತ್ತ ಅದರ ಕೂಗು ಸತತವಾಗಿ ಕೇಳಿಸುತ್ತಿತ್ತು.

Indian Scops-Owl ಮತ್ತು Jungle Owletಗಳ ಕೂಗುಗಳು ಪೂರ್ವಘಟ್ಟದ ಕಾಡುಗಳನ್ನು ನೆನಪಿಸುತ್ತದೆ. Indian Scops-Owlನ ಕೂಗನ್ನು ನಾನು ಮೊದಲಿಗೆ ಕೇಳಿದಾಗ ಅದು ಯಾವುದೋ ಕಪ್ಪೇ ಕೂಗು ಅಥವಾ ನೀರು ತೊಟ್ಟಿಕ್ಕುವ ಸದ್ದು ಇರಬಹುದು ಎಂದೆಣಿಸಿದ್ದೆ!

ಮಾಳದ ಮನೆಯ ಹತ್ತಿರ ರಾತ್ರಿಗಳಲ್ಲಿ Brown Wood-Owl ಮತ್ತು Brown Hawk Owlಗಳ (ಬದಲಾದ ಹೆಸರು Brown Boobook) ಧ್ವನಿ ಕೇಳಿಸುತ್ತಿರುತ್ತದೆ. ಚಳಿಗಾಲದಲ್ಲಿ ಮನೆಯ ಹತ್ತಿರ ಹೆಚ್ಚಾಗಿ ಕೇಳುವ ಮತ್ತೊಂದು ಗೂಬೆ Brown Fish-Owl. ರಾತ್ರಿಯ ನೀರವತೆಯಲ್ಲಿ ಅದರ ಹಮ್ ಎನ್ನುವ ಗುನುಗು ಕೇಳುತ್ತಿರುತ್ತದೆ. ಅಪರೂಪವಾದ Sri Lank Bay-Owl ಸಹಾ ಮನೆಯ ಹತ್ತಿರ ಆಗಾಗ ಕೇಳುತ್ತದೆ. ಅದರ ಬಗ್ಗೆ ಇದೇ ಬ್ಲಾಗ್‌ನಲ್ಲಿ ಹಿಂದೆ ಬರೆದಿದ್ದೆ. ಅದನ್ನು ಇಲ್ಲಿ ಓದಬಹುದು.

ಇದೇ ರೀತಿ ರಾತ್ರಿಯಲ್ಲಿ ಕೇಳುವ ಮತ್ತೊಂದು ಕೂಗು Sri Lanka Frogmouthನದ್ದು. ಇದು ಗೂಬೆ ಅಲ್ಲದಿದ್ದರೂ ಒಂದು ನಿಶಾಚರ ಪಕ್ಷಿ. ಕಳೆದ ಚಳಿಗಾಲದಲ್ಲಿ ಮನೆಯ ಹತ್ತಿರವೇ ಅದರ ಕೂಗನ್ನು ಹೆಚ್ಚುಬಾರಿ ಕೇಳಿದೆ.

Eastern Barn Owl ಮತ್ತು Spotted Owlet ಮಾತ್ರ ಕಾಡಿಗಿಂತ ಜನವಸತಿಗಳ ಹತ್ತಿರ ಹೆಚ್ಚಾಗಿ ನೋಡಲು ಸಿಗುತ್ತವೆ. ರಾತ್ರಿಯ ಹೊತ್ತು ಅವುಗಳ ಕೂಗು ಮನೆಗಳ ನಡುವೆ ಪ್ರತಿಧ್ವನಿಸುತ್ತವೆ. ಕೆಲವೇ ವರ್ಷಗಳ ಹಿಂದಿನವರೆಗೂ Eastern Barn Owl ಬೆಂಗಳೂರಿನ ಮನೆಯ ಸುತ್ತ ಇಲಿಗಳನ್ನು ಹಿಡಿಯುತ್ತಿರುವ ದೃಶ್ಯ ಕಾಣುತ್ತಿತ್ತು.

ಇಂದಿಗೂ ಗೂಬೆಗಳ ಕೂಗು ಕೇಳಿದಾಗ ನನಗೆ ಕುತೂಹಲವಾಗುತ್ತದೆ. ಕೆಲವು ಕೂಗುಗಳು ಮೈ ಜುಮ್ಮೆನಿಸುತ್ತವೆ. ಇನ್ನೂ ಕೆಲವು ವಿಚಿತ್ರವಾದ ನೆಮ್ಮದಿಯನ್ನು ಕೊಡುತ್ತವೆ. ಆದರೆ ಎಲ್ಲವೂ ರಾತ್ರಿಯ ನಿಗೂಢತೆಯನ್ನು ನೆನಪಿಸುತ್ತವೆ.

ಒಂದು ಗೂಬೆಯ ಕೂಗು ಇಷ್ಟೊಂದು ಕಾಡುಗಳನ್ನು, ಇಷ್ಟೊಂದು ವರ್ಷಗಳನ್ನು, ಇಷ್ಟೊಂದು ನೆನಪುಗಳನ್ನು ಒಟ್ಟಿಗೆ ಜೋಡಿಸಬಲ್ಲದು ಎಂದು ಆಗ ಅನ್ನಿಸಿತು.