ನೆಲದ ಮೇಲಿನ ಪಕ್ಷಿಗಳು

ಬಂಡಿಪುರದ ಮೋಯಾರ್ ಕುರುಚಲು ಕಾಡು, ಹುಲ್ಲುಗಾವಲಿನಲ್ಲಿ ಸುತ್ತಾಡುವಾಗ ಎಷ್ಟೊಂದು ಪಕ್ಷಿಗಳು ಹಾರಿ ಮರೆಯಾಗುತ್ತಿದ್ದವು. ಎಲ್ಲೋ ಮರದ ಮೇಲೆ ಕುಳಿತರೆ ಹುಡುಕಬಹುದೇನೋ, ಆದರೆ ಹುಲ್ಲುಗಳ ನಡುವೆ, ಪೊದೆಗಳ ಮಧ್ಯೆ ಅಡಗಿ ಕುಳಿತ ಅವುಗಳನ್ನು ಹುಡುಕಲು ಅಸಾಧ್ಯವಾದುದಕ್ಕೆ ಆ ಪಕ್ಷಿಗಳ ಬಣ್ಣವೂ ಕಾರಣ.
ಅಲ್ಲಿನ ಹುಲ್ಲು, ಪೊದೆ, ನೆಲದ ಮಣ್ಣಿನ ಬಣ್ಣ ಇವುಗಳಲ್ಲಿ ಕರಗಿ ಹೋಗುತ್ತದೆ. ಆದರೆ ಆ ಪಕ್ಷಿಗಳು ತುಂಬಾ ದೂರದವರೆಗೂ ಹಾರುವುದಿಲ್ಲ. ಸ್ವಲ್ಪದೂರ ಹಾರಿ, ಸ್ವಲ್ಪ ದೂರ ಓಡಿ ಪೊದೆಗಳಲ್ಲಿ ಮರೆಯಾಗುತ್ತದೆ. ಕೆಲವೊಮ್ಮೆ ಹತ್ತಿರ ಹೋಗುವವರೆವಿಗೂ ಸುಮ್ಮನಿದ್ದು, ತುಂಬಾ ಹತ್ತಿರವಾದಾಗ ಸದ್ದು ಮಾಡಿ ಹಾರುತ್ತದೆ. ನಾನು ಗೊತ್ತಿಲ್ಲದೆ ಈ ರೀತಿ ಪಕ್ಷಿಗಳ ತುಂಬಾ ಹತ್ತಿರ ಹೋಗಿ, ಅವುಗಳು ಹಾರಿ ಹೋದಾಗ ಬೆಚ್ಚಿ ಬಿದ್ದಿದ್ದೇನೆ.

ಮೋಯಾರ್ ಕಾಡಿನಲ್ಲಿ ಒಂದು ಬೆಳಗ್ಗೆ ಬರುತ್ತಿದ್ದಾಗ Indian Thick-knee ನೋಡಿದ್ದೆ. ಅದು ನಮ್ಮನ್ನು ನೋಡಿ ರಸ್ತೆಯಲ್ಲೇ ಸ್ವಲ್ಪ ದೂರ ಓಡಿ, ನಾಮಕಾವಸ್ಥೆಗೆ ಸ್ವಲ್ಪ ದೂರ ಹಾರಿ, ರಸ್ತೆಯಿಂದ ಸ್ವಲ್ಪ ಒಳಗೆ ಕುಳಿತುಕೊಂಡಿತು.

ಕಾವೇರಿ ತೀರದ ಕುರುಚಲು ಕಾಡುಗಳಲ್ಲಿ Painted Sandgrouse ನಾವು ಹೋಗುತ್ತಿದ್ದಂತೆ, ನಮ್ಮಿಂದ ಸ್ವಲ್ಪ ದೂರ ಓಡಿ, ನಮಗೆ ಬೆನ್ನು ಹಾಕಿ, ಇನ್ನೇನು ಹಾರುವ ಭಂಗಿಯಲ್ಲಿ ಕುಳಿತಿತ್ತು.

ಟಿಟ್ಟಿಭ - Red-wattled Lapwing ತುಂಬಾ ಗಲಾಟೆಗಾರ ಪಕ್ಷಿ, ಆದರೆ ಹಳದಿ ಬಣ್ಣದ Yellow-wattled Lapwing ಯಾವುದೇ ಸದ್ದು ಮಾಡದೆ ಓಡುತ್ತಾ ಪೊದೆಯಲ್ಲಿ ಮರೆಯಾಗುತ್ತದೆ.

ಇದೇ ತರಹದ Francolin, Partridge, Quail, Spurfowlಗಳಂತಹ ಹೆಚ್ಚಾಗಿ ನೆಲದಮೇಲೆ ನಡೆದಾಡುವ ಪಕ್ಷಿಗಳು ಸುಲಭವಾಗಿ ಹಕ್ಕಿ-ಪಿಕ್ಕಿಯವರಿಗೆ, ಉರುಳು ಹಾಕಿ ಹಿಡಿಯುವವರಿಗೆ ಬಲಿಯಾಗುತ್ತಿವೆ. Partridge ಪಕ್ಷಿಗೆ ಕನ್ನಡದಲ್ಲಿ ಗೌಜಲಕ್ಕಿ ಎನ್ನುವ ಕನ್ನಡ ಹೆಸರಿದೆ. ಆದರೆ ಇಂದಿನ ಈ ಪಕ್ಷಿಗಳ ಬೇಟೆಗಾರರು ಎಲ್ಲವನ್ನೂ ಸೇರಿಸಿ ಗೌಜಲಕ್ಕಿ ಎಂಬ ಒಂದೇ ಹೆಸರಿನಿಂದ ಕರೆಯುತ್ತಾರೆ.