ಚಿಪ್ಪು ಕೀಟಗಳು

ಸುಮಾರು ಹದಿನೈದು ವರ್ಷಗಳ ಹಿಂದೆ ನಮ್ಮ ಮನೆಯಲ್ಲಿ, ಕುಂಡಗಳಲ್ಲಿ ಹೂವಿನ ಗಿಡಗಳನ್ನು ಬೆಳಿಸಿದ್ದೆವು. ಇದರಲ್ಲಿ ನಂದಿಬಟ್ಟಲು ಗಿಡವು ಸೇರಿತ್ತು. ಮೂರು ಗಿಡಗಳಿಂದ ಒಂದಷ್ಟು ಹೂವುಗಳು ಸಿಗುತ್ತಿತ್ತು. ಕೆಲವು ವರ್ಷಗಳೊ ಅಥವಾ ತಿಂಗಳುಗಳೊ ಸರಿಯಾಗಿ ನೆನಪಿಲ್ಲ ಕಳೆದಿತ್ತು, ನಂದಿಬಟ್ಟಲಿನ ಗಿಡದ ಟೊಂಗೆಯ ಮೇಲೆ ಕಂದು ಬಣ್ಣದ ಗುಳ್ಳೆಗಳು ಮೂಡ ತೊಡಗಿದವು. ಗಿಡಕ್ಕೆ ಏನೊ ಖಾಹಿಲೆ ಬಂದಿದೆ ಎಂದುಕೊಂಡೆ. ಆ ಗುಳ್ಳೆಗಳನ್ನು ಕೀಳಲು ಪ್ರಯತ್ನ ಪಟ್ಟರು ಸಾಧ್ಯವಾಗಲಿಲ್ಲ. ಈ ಗುಳ್ಳೆಗಳು ಹೆಚ್ಚಿದಂತೆಲ್ಲ ಗಿಡದ ಮೇಲೆ ಗೊದ್ದಗಳು ಓಡಾಡಲು ಶುರುಮಾಡಿದವು. ಕೆಲವೊಮ್ಮೆ ಗುಂಪಾಗಿ ಗಿಡದ ತುದಿಗಳಲ್ಲಿ ಅಥವಾ ಎಲೆಗಳ ಮರೆಯಲ್ಲಿ ತಟಸ್ಥ ವಾಗಿ ಕುಳಿತಿರುತ್ತಿದ್ದವು. ಹೀಗೆ ಅನೇಕ ದಿನಗಳವರೆಗು ಇದ್ದ ಇವನ್ನು ಕ್ರಮೇಣ ನಾನು ಮರೆತು ಬಿಟ್ಟೆ. 

ಪಾರಿಜಾತ ಗಿಡದ ಮೇಲಿನ ಚಿಪ್ಪು ಕೀಟ

ಮುಂದೆ ನಮ್ಮ ಕೈ ತೋಟದಲ್ಲಿ ಪಾರಿಜಾತ ಗಿಡವನ್ನು ನೆಟ್ಟು ಬೆಳೆಸಿದ್ದೆವು. ಇದು ಸುಮಾರು ಹದಿನೈದು ಅಡಿವರೆಗು ಬೆಳೆದಿತ್ತು. ಬೆಳಗಿನ ಹೊತ್ತು ಈ ಗಿಡದ ಮೇಲೆ ಇರುತ್ತಿದ್ದ, ಕೀಟಗಳು ಅಥವಾ ಜೇಡಗಳನ್ನು ನೋಡುವುದು ನನ್ನ ನೆಚ್ಚಿನ ಹವ್ಯಾಸವಾಗಿತ್ತು. ಕೆಲವೊಮ್ಮೆ ಅವುಗಳ ಫೋಟೊ ತೆಗೆಯುತ್ತಿದ್ದೆ. ಹೀಗೆ ಗಮನಿಸುವಾಗ ಗಿಡದ ಕಾಂಡದ ಮೇಲೆ ಬಟನ್ ರೀತಿ ಕಾಣುವ ವಸ್ತುವನ್ನು ನೋಡುತ್ತಿದ್ದೆ. ಇದು ಆ ಗಿಡದ ಭಾಗವೆಂದು ತಿಳಿದಿದ್ದೆ. 

ಮುಂದೆ ತಿಳಿಯಿತು ಈ ಎರಡು ಸನ್ನಿವೇಶಗಳಲ್ಲಿ ನಾನು ನೋಡಿದ್ದು ಕೀಟವೆಂದು. ಕೀಟಗಳು ಹೀಗೆ ಕಾಣುತ್ತವೆ ಎಂದು ನಾನು ಊಹಿಸಿಯು ಇರಲಿಲ್ಲ ಏಕೆಂದರೆ ಕೀಟಗಳು ಎಂದೊಡನೆ ನಮ್ಮ ಕಲ್ಪನೆಗೆ ಬರುವುದು ಆರು ಕಾಲುಗಳನ್ನು ಹೊಂದಿರುವ, ರೆಕ್ಕೆಯನ್ನು ಹೊಂದಿರುವ ಜೀವಿಗಳು. ಬಟನ್ ಅಥವಾ ಗುಳ್ಳೆಯಂತೆ ಕಾಣುವ, ಚಲಿಸದೆ ಒಂದೆಡೆ ಕುಳಿತಿರುವ ಕೀಟಗಳು ಸೋಜಿಗವಾಗಿ ಕಾಣುತ್ತವೆ. ನೋಡಲು ಪ್ರಾಣಿಗಳ ಚಿಪ್ಪುಗಳನ್ನು (scales) ಹೋಲುವುದರಿಂದ, ಇವನ್ನು ಚಿಪ್ಪು ಕೀಟಗಳು ಎಂದು ಕರೆಯಬಹುದು. 

ನಂದಿಬಟ್ಟಲು ಗಿಡದ ಮೇಲಿನ ಚಿಪ್ಪು ಕೀಟ

ಚಿಪ್ಪು ಕೀಟಗಳು ವೈಜ್ಞಾನಿಕವಾಗಿ ಹೆಮಿಪ್ಟೆರ ಎಂಬ ವ್ಯವಸ್ಥೆಯಲ್ಲಿ ಮತ್ತು ಕೊಕೊಇಡಿಯ ಎಂಬ ಪ್ರಕುಟುಂಬದಲ್ಲಿ ವರ್ಗೀಕರಿಸಲಾಗಿದೆ. ಇದರಲ್ಲಿ ಸುಮಾರು ೮೦೦೦ ಪ್ರಭೇದಗಳನ್ನು ಗುರುತಿಸಲಾಗಿದೆ. 

ಚಿಪ್ಪು ಕೀಟಗಳನ್ನು ಆಕಾರದಲ್ಲಿ ಅನೇಕ ಬಗೆಯಲ್ಲಿ ಕಾಣಬಹುದು. ಇವುಗಳ ಗಾತ್ರ ೧ ಮಿಮೀ ನಿಂದ ೫ ಮಿಮೀವರೆಗು ಇರುತ್ತದೆ. ಕೆಲವು ಕೀಟಗಳು ಮೇಣದಂಥ ಹೊದಿಕೆಯನ್ನು ಹೊಂದಿದ್ದರೆ ಇನ್ನೂ ಕೆಲವು ಹೊಳೆಯುವ ಮುತ್ತಿನಂತಿರಿತ್ತವೆ. ಹೆಣ್ಣು ಕೀಟ, ವಯಸ್ಕವಾದ ಮೇಲು ತನ್ನ ಆಕಾರವನ್ನು ಹಾಗೆ ಉಳಿಸಿಕೊಳ್ಳುತ್ತದೆ ಮತ್ತು ಚಲಿಸದೆ ಒಂದೆಡೆ ಗಿಡಕ್ಕೆ ಅಂಟಿಕೊಂಡು ಬಿಡುತ್ತದೆ. ಕೆಲವು ಪ್ರಬೇಧಗಳಲ್ಲಿ ಗಂಡು ಕೀಟಗಳು ರೆಕ್ಕೆಯನ್ನು ಹೊಂದಿವೆ. ಆದರೆ ಮುಂಭಾಗದ ಜೋಡಿ ರೆಕ್ಕೆಗಳು ಮಾತ್ರ ಕಾರ್ಯ ನಿರ್ವಹಿಸುತ್ತವೆ. 

ಮೊಟ್ಟೆ ಒಡೆದು ಹೊರ ಬಂದ ಮರಿಗಳಿಗೆ ಕಾಲುಗಳಿರುತ್ತವೆ, ಇವು ನಿಧಾನವಾಗಿ ಚಲಿಸಿ ಸೂಕ್ತವಾದ ಜಾಗವನ್ನರಸಿ ಬೀಡು ಬಿಡುತ್ತವೆ. 

ಬಹುತೇಕ ಚಿಪ್ಪು ಕೀಟಗಳು ಪರೋಪಜೀವಿಗಳು. ಇವು ಗಿಡದ ರಸವನ್ನು ಹೀರಿ ಬದುಕುತ್ತವೆ. ಅಲ್ಲದೆ ಇವು ಒಂದು ರೀತಿಯ ಸಿಹಿಯ ದ್ರವವನ್ನು ಸ್ರವಿಸುತ್ತವೆ. ಈ ದ್ರವವನ್ನು ಇರುವೆಗಳು ಕಲೆ ಹಾಕುತ್ತವೆ. ಹಾಗಾಗಿ ಚಿಪ್ಪು ಕೀಟಗಳೊಂದಿಗೆ ಇರುವೆಗಳು ಸಹಜೀವನ ನಡೆಸುತ್ತವೆ. 

ಚಿಪ್ಪು ಕೀಟಗಳೊಂದಿಗೆ ಇರುವೆಗಳು ಸಹಜೀವನ ನಡೆಸುತ್ತವೆ

ಚಿಪ್ಪು ಕೀಟಗಳು ಕೆಲವೊಮ್ಮೆ ಅತಿಥೇಯ ಗಿಡಗಳಿಗೆ ಉಪದ್ರವಕಾರಿಗಳಾಗುತ್ತವೆ. ಗಿಡಗಳು ತಮ್ಮ ದ್ರವವನ್ನು ಕಳೆದು ಕೊಂಡು ಸಾವನ್ನಪ್ಪುತ್ತವೆ. ಮೇಣದಂಥ ಹೊರ ಪದರವನ್ನು ಹೊಂದಿರುವ ಇವು ಕೀಟನಾಶಕಗಳಿಂದ ಅಷ್ಟು ಸುಲಭವಾಗಿ ನಿರ್ಮೂಲನೆಯಾಗುವುದಿಲ್ಲ. 

ಚಿಪ್ಪು ಕೀಟಗಳು ಗಿಡಗಳಿಗೆ ಮಾರಕವಾಗಿವುದರಿಂದ ಇವನ್ನು ಜೈವಿಕ ಕಳೆ ನಾಶಕವಾಗಿ ಬಳಸಲಾಗುತ್ತದೆ. ಇವುಗಳ ಮೇಣದಂಥ ವಸ್ತುವಿನಿಂದ ಶೆಲ್ಲಾಕ್ ನನ್ನು ತಯಾರಿಸಲಾಗುತ್ತದೆ. ಶೆಲ್ಲಾಕ್ ಮರಗಳಿಂದ ಮಾಡಿರುವ ಪೀಠೋಪಕರಣಗಳಿಗೆ ಪಾಲಿಶ್ ಮಾಡಲು ಬಳಸಲಾಗುತ್ತದೆ.