ನ್ಯೂ ಹೊರೈಜನ್: ಕತ್ತಲ ಲೋಕದ ಅನಾವರಣ

ನ್ಯೂ ಹೊರೈಜನ್‍ ಗಗನ ನೌಕೆ. 

Image Credit: NASA

ಅಕ್ಟೋಬರ್ 1991, ಯು ಎಸ್ ಪಿ ಎಸ್ (United States Postal Service) ನಾಸಾದ ಸೌರ ಮಂಡಲದ ಅನ್ವೇಷಣೆ ಕುರಿತು ಅಂಚೆಚೀಟಿಯ ಸರಣಿಯನ್ನು ಹೊರತಂದಿತು. ಅದರಲ್ಲಿ ಒಂದು ಚೀಟಿ ಬಹುತೇಕ ಜನರ ಗಮನ ಸೆಳೆಯಿತು ಏಕೆಂದರೆ ಆ ಚೀಟಿ ಪ್ಲೂಟೊ ಕುರಿತಾಗಿತ್ತು ಮತ್ತು ಅದರಲ್ಲಿ “ಪ್ಲೂಟೊ-ಇನ್ನು ಅನ್ವೇಷಿಸಲಾಗಿಲ್ಲ” ಎಂಬ ಬರಹವಿತ್ತು. ಇದಕ್ಕೆ ಕಾರಣ ಅಂದಿನವರೆಗು ನಾಸಾ ಹೊರಗಿನ ಸೌರಮಂಡಲವನ್ನು ಅನ್ವೇಷಿಸಲು  ಕಳುಹಿಸಿದ್ದ ಯಾವುದೆ ಆಕಾಶಕಾಯ ಕೂಡ ಪ್ಲೂಟೊ ಸಮೀಪ ಸಾಗಿರಲಿಲ್ಲ!!!

ಯುಎಸ್‍ಪಿಎಸ್‍ನ ಅಂಚೆಚೀಟಿ

ನಾಸಾ ಸಂಸ್ಥೆ 20ನೇ ಶತಮಾನದ 70 ಮತ್ತು 80ರ ದಶಕದಲ್ಲಿ ವೋಯೇಜರ್ ಎಂಬ ಎರಡು ನೌಕೆಗಳನ್ನು ಕಳುಹಿಸಿ ಹೊರ ಸೌರಮಂಡಲದಲ್ಲಿರುವ ದೈತ್ಯ ಗ್ರಹಗಳಾದ ಗುರು, ಶನಿ, ಯುರೇನಸ್ ಮತ್ತು ನೆಪ್ಚೂನ್‍ಗಳನ್ನು ಅನ್ವೇಷಿಸಿತು. ಆದರೆ ಅಂದು ಒಂಬತ್ತನೆ ಗ್ರಹವಾಗಿದ್ದ ಪ್ಲೂಟೊವನ್ನು ಅನ್ವೇಷಿಸಲಾಗಿರಲಿಲ್ಲ. ಹೀಗಾಗಿ ಯುಎಸ್‍ಪಿಎಸ್‍ನ ಅಂಚೆಚೀಟಿಯಲ್ಲಿ ಅಂತಹ ಬರಹವಿತ್ತು. ಈ ಅಂಚೆಚೀಟಿ ಅನೇಕ ವಿಜ್ಞಾನಿಗಳನ್ನು ಪ್ಲೂಟೊವನ್ನು ಅನ್ವೇಷಿಸಲು ಪ್ರಚೋದಿಸಿತು.

ಪ್ಲೂಟೊವನ್ನು 1930ರಲ್ಲಿ ಕ್ಲೈಡ್ ಟಾಮ್ ಬಾಗ್ ಎಂಬ ವಿಜ್ಞಾನಿ ಗುರುತಿಸಿದ. ಇದಾದ ನಂತರ ಹಲವರಿಗೆ ಈ ಗ್ರಹವನ್ನು ಸಂಶೋಧಿಸಲು ಆಸಕ್ತಿಯಿತ್ತು. 1980 ದಶಕದಲ್ಲಿ ವೋಯೇಜರ್1 ಶನಿಗ್ರಹ ದ ಬಳಿ ತಲುಪಿದಾಗ, ಅಲ್ಲಿಂದ ಕವಣೆ ಹೊಡೆತದ (sling shot) ಮೂಲಕ  ವೋಯೇಜರ್1ನ್ನು ಪ್ಲೂಟೊದೆಡೆಗೆ ಕಳುಹಿಸಬೇಕೆಂಬ ಆಸೆ ಕೆಲವು ವಿಜ್ಞಾನಿಗಳಲ್ಲಿ ಇತ್ತು. ಆದರೆ ಅಂದು ಪ್ಲೂಟೊಗಿಂತ ಶನಿಗ್ರಹದ ಉಪಗ್ರಹವಾದ ಟೈಟಾನ್‍ನನ್ನು ಅನ್ವೇಷಿಸುವುದು ಮುಖ್ಯವಾಗಿತ್ತು. ಹಾಗಾಗಿ ವಿಜ್ಞಾನಿಗಳು ಈ ಆಸೆಯನ್ನು ಕೈ ಬಿಟ್ಟರು. ಮುಂದೆ ವೋಯೇಜರ್2 ಸಹ ಪ್ಲೂಟೊ ಬಳಿ ಹಾದು ಹೋಗಲಿಲ್ಲ!!!

1990ರಲ್ಲಿ  ನಾಸಾದ ಇಂಜಿನಿಯರ್‍ಗಳು ಕೆಲವು ವಿಜ್ಞಾನಿಗಳ ಒತ್ತಾಯದ ಮೇಲೆ ಪ್ಲೂಟೊಗೆ ಕಳುಹಿಸುವ ನೌಕೆಯ ಬಗ್ಗೆ ಚಿಂತಿಸತೊಡಗಿದರು. ಪ್ಲೂಟೊದ ವಾತಾವರಣ ಚಳಿಗಾಲದಲ್ಲಿ ಹಿಮಗಟ್ಟಿ ನೆಲಮಟ್ಚವಾಗುವುದರಿಂದ ಇದಕ್ಕೆ ಮುನ್ನವಾಗಿ ನೌಕೆಯನ್ನು ಕಳುಹಿಸುವುದು ಅನಿವಾರ್ಯವಾಗಿತ್ತು. ಇದಕ್ಕಾಗಿ ನೌಕೆಯ ತೂಕ ಕೇವಲ 40 ಕೆಜಿಯಷ್ಟು ಇರಬೇಕಾಗಿತ್ತು. ಆದರೆ ಅಷ್ಟು ಚಿಕ್ಕ ಉಪಕರಣಗಳನ್ನು ಸಿದ್ಧ ಪಡಿಸಲು ಆಗಿನ್ನು ಸಾಧ್ಯವಿರಲಿಲ್ಲ ಅದಕ್ಕಾಗಿ ಈ ಯೋಜನೆಯನ್ನು ಕೈಬಿಡಲಾಯಿತು. ಮುಂದೆ ಅನೇಕ ವಿಜ್ಞಾನಿಗಳು ಪ್ಲೂಟೊಗೆ ಕಳುಹಿಸಬಹುದಾದ ನೌಕೆಯ ಬಗ್ಗೆ ವಿವಿಧ ಯೋಜನೆಗಳನ್ನು ನಾಸಾದ ಮುಂದಿಟ್ಟರು. ಆದರೆ ನಾಸಾದ ಚಿಂತಕರು ಆ ಯೋಜನೆಗಳಲ್ಲಿ ಲೋಪಗಳಿದ್ದಿದ್ದರಿಂದ ಅವನ್ನೆಲ್ಲ ನಿರಾಕರಿಸಿದರು. 2001ರಲ್ಲಿ ನಾಸಾ ತನ್ನ ನ್ಯೂ ಫ್ರಾಂಟಿಯರ್ಸ್ ಮಿಶನ್‍ನ ಮೊದಲ ಯೋಜನೆಯಾಗಿ 'ನ್ಯೂ ಹೊರೈಜನ್'ನನ್ನು ಆಯ್ಕೆ ಮಾಡಿಕೊಂಡಿತು.

ನ್ಯೂ ಹೊರೈಜನ್‍ನ ಗುರಿಗಳು ಕೆಳಕಂಡಂತೆ ಇತ್ತು

Ø  ಪ್ಲೂಟೊ ಮತ್ತು ಅದರ ಉಪಗ್ರಹಗಳಾದ ಚೇರಾನ್, ನಿಕ್ಸ್ ಮತ್ತು ಹೈಡ್ರಾ ವಾತಾವರಣದ ಅಧ್ಯಯನ.

Ø  ಪ್ಲೂಟೊ ಮತ್ತು ಚೇರಾನ್‍ನ ಹೊರಮೈ ಚಿತ್ರಣ

Ø  ಚೇರಾನ್‍ನಲ್ಲಿ ವಾತಾವರಣದ ಹುಡುಕಾಟ.

Ø  ಪ್ಲೂಟೊ ಮತ್ತು ಚೇರಾನ್‍ನ ಹೊರಮೈ ತಾಪಮಾನದ ಚಿತ್ರಣ.

Ø  ಉಂಗುರ ಮತ್ತು ಇತರ ಉಪಗ್ರಹಗಳಿಗಾಗಿ ಹುಡುಕಾಟ.

Ø  ಕ್ಯೂಪರ್ ಪಟ್ಟಿಯ ವಸ್ತುಗಳ ಅನ್ವೇಷಣೆ.

Ø  ಮತ್ತು ಮುಂತಾದ ಗುರಿಗಳು

ಜನವರಿ 19, 2006ರಂದು ನ್ಯೂ ಹೊರೈಜನ್ ನೌಕೆಯನ್ನು ಹಾರಿಬಿಡಲಾಯಿತು. ಇದುವರೆಗು ಹಾರಿಬಿಟ್ಟ ನೌಕೆಗಳೆಲ್ಲ ಅತ್ಯಂತ ವೇಗವಾಗಿ ಹಾರಿಬಿಟ್ಟ ನೌಕೆಯೆಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಇದನ್ನು ನೇರವಾಗಿ ಸೋಲಾರ್ ಎಸ್ಕೇಪ್ ಟ್ರಾಜೆಕ್ಟರಿಗೆ ಹಾರಿ ಬಿಡಲಾಯಿತು. ಇದಕ್ಕಾಗಿ ನೌಕೆಯೊಂದು 16.5km/sನಷ್ಟು ವೇಗವಾಗಿ ಚಲಿಸಬೇಕಾಗುತ್ತದೆ.

ಗುರುಮಂಡಲ. 

Image Credit: NASA

ನ್ಯೂ ಹೊರೈಜನ್  ತನ್ನ ಪಥದಲ್ಲಿ ಚಲಿಸುವಾಗ ಎದುರಾಗಬಹುದಾದ ಆಕಾಶಕಾಯಗಳ ಚಿತ್ರಗಳನ್ನು ಸೆರೆಹಿಡಿಯ ಬೇಕೆಂದು ಚಿಂತಿಸಲಾಗಿತ್ತು. ಅದರಂತೆ ಸೆಪ್ಟೆಂಬರ್ 2006ರಲ್ಲಿ ಗುರುಗ್ರಹದ ಚಿತ್ರವನ್ನು ಸುಮಾರು 291 ದಶಲಕ್ಷ ಕಿಮೀನಷ್ಟು ದೂರದಿಂದ ಸೆರೆಹಿಡಿಯಿತು. ಮುಂದೆ 2007ರ ಜನವರಿಯಲ್ಲಿ  ಗುರುಗ್ರಹದ ಉಪಗ್ರಹವಾದ ಕೆಲಿಸ್ಟೊದ ಕೆಳಗೆಂಪು (infrared) ಚಿತ್ರವನ್ನು ಸರೆಹಿಡಿಯಲಾಯಿತು. ಇದಲ್ಲದೆ ಗುರುಗ್ರಹಕ್ಕೆ 2.3 ದಶಲಕ್ಷ ಕಿಮೀನಷ್ಟು ದೂರವಿದ್ದಾಗ ಗುರುಗ್ರಹದ ಸಹಾಯದಿಂದ ತನ್ನ ವೇಗವನ್ನು 23km/s ಗೆ ಹೆಚ್ಚಸಿಕೊಂಡಿತು.

ಚೇರಾನ್‍ ಪ್ಲೂಟೊ ಸುತ್ತ ಸಂಪೂರ್ಣವಾಗಿ ಪ್ರದಕ್ಷಿಣೆ ಹಾಕಿದ್ದು ಗೋಚರಿಸಿತು. 

Image Credit: NASA

ಗುರುಮಂಡಲವನ್ನು ಹಾದ ಬಳಿಕ ನ್ಯೂ ಹೊರೈಜನ್ ಪ್ಲೂಟೊದೆಡೆಗೆ ಬಹುತೇಕ ನಿದ್ರಾವಸ್ಥೆ ಹೋಗಲಾರಂಭಿಸಿತು. ಮುಂದೆ 2013ರ ಜುಲೈ 1 ರಿಂದ 3 ರವರೆಗು ತೆಗದ ಚಿತ್ರಗಳಲ್ಲಿ ಪ್ಲೂಟೊ ಮತ್ತು ಚೇರಾನ್‍ ಪ್ರತ್ಯೇಕವಾಗಿ ಕಾಣಿಸಿಕೊಂಡವು. ಜುಲೈ 2014 19ರಿಂದ 24ರವರೆಗು ತೆಗೆದ ಚಿತ್ರಗಳಲ್ಲಿ ಚೇರಾನ್‍ ಪ್ಲೂಟೊ ಸುತ್ತ ಸಂಪೂರ್ಣವಾಗಿ ಪ್ರದಕ್ಷಿಣೆ ಹಾಕಿದ್ದು ಗೋಚರಿಸಿತು. ಇದು 429ರಿಂದ 422 ಮಿಲಿಯನ್ ಕಿ.ಮೀ. ದೂರದಿಂದ ತೆಗೆದ ಚಿತ್ರವಾಗಿತ್ತು. ಡಿಸೆಂಬರ್ 6, 2014ರಲ್ಲಿ ನ್ಯೂ ಹೊರೈಜನ್‍ಗೆ ಎಚ್ಚರವಾಗುವಂತೆ ನಾಸಾದ ವಿಜ್ಞಾನಿಗಳು ಸಂದೇಶ ಕಳುಹಿಸಿದರು. ಅದೇ ದಿನ ನ್ಯೂ ಹೊರೈಜನ್ ತಾನು ಎಚ್ಚರವಾಗಿರುವುದಾಗಿ ಬದಲಿ ಸಂದೇಶವನ್ನು ಭೂಮಿಗೆ ರವಾನಿಸಿತು.

ಪ್ಲೂಟೊದ ಬಣ್ಣದ ಚಿತ್ರ. 

Image Credit: NASA

ಜನವರಿ 2015 ರಿಂದ ನ್ಯೂ ಹೊರೈಜನ್ ಪ್ಲೂಟೊದ ಚಿತ್ರಗಳನ್ನು ಸೆರೆಹಿಡಿಯುತ್ತಾ ಮುಂದೆ ಸಾಗಿತು. ಏಪ್ರಿಲ್‍ನಲ್ಲಿ ತೆಗೆದ ಚಿತ್ರಗಳಲ್ಲಿ ಪ್ಲೂಟೊದ ಚಿಕ್ಕ ಉಪಗ್ರಹಗಳಾದ ಕೆರ್ಬರೋಸ್ ಮತ್ತು ಸ್ಟಿಕ್ಸ್ ಸಹ ಗೋಚರಿಸಿಕೊಂಡವು. ನ್ಯೂ ಹೊರೈಜನ್  ಜುಲೈ 14 2015ರಂದು ಪ್ಲೂಟೊಗೆ ಅತ್ಯಂತ ಸನಿಹದಲ್ಲಿ ಹಾದು ಹೋಯಿತು. ಇದರ ದೂರ ಪ್ಲೂಟೊದಿಂದ ಕೇವಲ 12472 ಕಿ.ಮೀ.ನಷ್ಟಿತ್ತು. ಇದಾದ 22 ಗಂಟೆಗಳ ಬಳಿಕ ಭೂಮಿಗೆ ಇದರ ಬಗ್ಗೆ ಮಾಹಿತಿ ಲಭಿಸಿತು. ನ್ಯೂ ಹೊರೈಜನ್ ಕಳುಹಿಸಿರುವ ಎಲ್ಲ ಮಾಹಿತಿ ಡೌನ್‍ಲೋಡ್ ಆಗಬೇಕಾದರೆ 16 ತಿಂಗಳುಗಳ ಕಾಲ ಬೇಕಾಗುತ್ತದೆ.

ಪ್ಲೂಟೊ ಮತ್ತು ಚೇರಾನ್‍. Image Credit: NASA

ಜುಲೈ 15ರಂದು ಪ್ಲೂಟೊವನ್ನು ದಾಟಿದ ನ್ಯೂ ಹೊರೈಜನ್ ಈಗ ಸೂರ್ಯನಿಂದ ಸುಮಾರು 33.32 AUರಷ್ಟು ದೂರದಲ್ಲಿದೆ ಮತ್ತು ಸ್ಯಾಗಿಟೇರಿಯಸ್ ರಾಶಿಯೆಡೆಗೆ ಚಲಿಸುತ್ತಿದೆ. ನ್ಯೂ ಹೊರೈಜನ್ ಯೋಜನೆಯ ಆರಂಭದಲ್ಲಿ ಪ್ಲೂಟೊ ನಂತರ ಕ್ಯೂಪರ್ ಪಟ್ಟಿಯ ಕಾಯಗಳನ್ನು ಅನ್ವೇಷಿಸಬೇಕೆಂಬ ಇರಾದೆಯಿತ್ತು. ಆದರೆ ಈಗ ಅದರ ಪಥದಲ್ಲಿ ಅಂಥ ಯಾವುದೆ ದೊಡ್ಡ ಕಾಯಗಳಲಿಲ್ಲ ಹಾಗಾಗಿ ಇದ್ದ ಕಾಯಗಳಲ್ಲೆ ಸ್ವಲ್ಪ ದೊಡ್ಡದಾದ ಒಂದನ್ನು ಆಯ್ಕೆ ಮಾಡಿಕೊಳ್ಳಲಗಿದೆ. ಇದಕ್ಕೆ 2014 MU₆₉ ಎಂಬ ಹೆಸರನ್ನು ಕೊಡಲಾಗಿದೆ.ಇದರ ವ್ಯಾಸ ಸುಮಾರು 30-45 km ನಷ್ಟಿದೆ. ಇದನ್ನು ನ್ಯೂ ಹೊರೈಜನ್ ಜನವರಿ 2019ರಲ್ಲಿ ಎದುರುಗೊಳ್ಳಲಿದೆ.

ನ್ಯೂ ಹೊರೈಜನ್‍ನ ಒಂದು ಹೆಗ್ಗಳಿಕೆಯೆಂದರೆ ಇದು ಉಳಿದ ಯಾವುದೆ ಕಾಯಕ್ಕಿಂತ ವೇಗದಲ್ಲಿ ಹಾರಿಬಿಟ್ಟ ಕಾಯವೆಂದು. ಆದರೆ ಇದು ಎಂದಿಗು ವೋಯೇಜರ್1ನ್ನು ಹಿಂದಿಕ್ಕಲಾಗುವುದಿಲ್ಲ. ಏಕೆಂದರೆ ವೋಯೇಜರ್1 ಶನಿಗ್ರಹದ ಸಹಾಯದಿಂದ ತನ್ನ ವೇಗವನ್ನು ಹೆಚ್ಚಿಸಿಕೊಂಡಿತು. ನ್ಯೂ ಹೊರೈಜನ್ ಸಹ ವೋಯೇಜರ್‍ಗಳಂತೆ ಅಂತರಿಕ್ಷದಲ್ಲಿ ನಿರಂತರವಾಗಿ ಸಾಗುತ್ತಲೆ ಇರುತ್ತದೆ.

ಗುರು ಮತ್ತು ಅಯೋ. 

Image Credit: NASA

ಪ್ಲೂಟೊದ ವಾತಾವರಣ. 

Image Credit: NASA

ಚೇರಾನ್‍ ಮತ್ತು ಇತರ ಉಪಗ್ರಹಗಳು. 

Image Credit: NASA