ಮಂದಾರ

ಮಂದಾರ ಪುಷ್ಪ

ಫೆಬ್ರವರಿ-ಮಾರ್ಚ್ ತಿಂಗಳು ಬಂತೆಂದರೆ ಭಾರತ ಮೂಲದ ಅನೇಕ ಮರಗಳು ಎಲೆಯುದುರಿಸಿ ಹೂ ಬಿಡುತ್ತವೆ. ಇದರಲ್ಲಿ ಕೆಲವು ಮರಗಳಂತು ಕೆಂಪು ಹಳದಿ ವರ್ಣಮಯ ಹೂ ತಳೆಯುತ್ತವೆ. ದೂರದಿಂದ ನೋಡಿದಾಗ
ಮರಕ್ಕೆ ಬೆಂಕಿ ಬಿದ್ದಿರುವಂತೆ ಭಾಸವಾಗುತ್ತದೆ. ಹಾಗಾಗಿ ಇಂತಹ ಮರಗಳನ್ನು ಕಾಡಿನ ಬೆಂಕಿ ಎಂದು ಕರೆಯುತ್ತಾರೆ. ಅಂತಹ ಗುಂಪಿಗೆ ಸೇರಿದ ಒಂದು ಮರವೆ ಮಂದಾರ.

Erythrina Strictaಮಂದಾರದ ವೈಜ್ಙಾನಿಕ ಹೆಸರು. ಇದನ್ನು ಸಾಮಾನ್ಯವಾಗಿ, ಕಾರ್ಕಿ ಕೋರಲ್ ಟ್ರೀ ಎಂದು ಇಂಗ್ಲೀಷಿನಲ್ಲಿ, ಪಾರಿಭದ್ರ ಎಂದು ಸಂಸ್ಕೃತದಲ್ಲಿ ಕರೆಯುತ್ತಾರೆ. ಕನ್ನಡದಲ್ಲಿ ಇನ್ನು ಕೆಲವು ಹೆಸರುಗಳುಂಟು ಅವು ಹಲಿವಾಣ, ಕೀಚಿಗೆ ಎಂದು. Erythrina ಗುಂಪಿನ ಮರಗಳನ್ನು ಪ್ರಪಂಚದಲ್ಲಿಯೆ ಸುಂದರ ಮರಗಳಲ್ಲೊಂದು ಎಂದು ಪರಿಗಣಿಸಲಾಗಿದೆ.

ಮಂದಾರದ ಎಲೆಗಳು

ಮಂದಾರದ ಮುಳ್ಳು

ಮಂದಾರ ಭಾರತದ ನಗರ, ಹಳ್ಳಿಗಳ ಹೊರವಲಯಗಳಲ್ಲಿ ಮತ್ತು ಕಾಡುಗಳಲ್ಲಿ ಬೆಳೆಯುತ್ತದೆ. ಸಂಪೂರ್ಣವಾಗಿ ಬೆಳೆದ ಮರ ಸುಮಾರು ೧೨ ಮೀನಷ್ಟು ಎತ್ತರ ವಿರುತ್ತದೆ. ಈ ಮರದ ತೊಗಟೆಯ ಮೇಲೆ ಚಿಕ್ಕ ಮುಳ್ಳುಗಳಿರುತ್ತವೆ. ಎಲೆಗಳು ಸಂಕೀರ್ಣವಾಗಿದ್ದು ಮೂರು ಉಪಎಲೆಗಳನ್ನು ಹೊಂದಿರುತ್ತವೆ. ಎಲೆಗಳ ಸಮೂಹ ಒತ್ತಾಗಿರದೆ ವಿರಳವಾಗಿರುತ್ತದೆ. ಇವುಗಳ ಹೂವು ನೋಡಲು ಆಕರ್ಷಕವಾಗಿದ್ದು ಕೆಂಪು ,ಕಿತ್ತಳೆ ಬಣ್ಣದಿಂದ ಕೂಡಿರುತ್ತದೆ ಮತ್ತು ಒತ್ತೊತ್ತಾಗಿ ಗೊಂಚಲು ಗಳಲ್ಲಿರುತ್ತದೆ. ಒಂದು ಹೂವಿನಲ್ಲಿ ಐದು ಎಸಳುಗಳಿರುತ್ತವೆ. ಕಾಯಿ ಹುರುಳಿ ರೀತಿಯಲ್ಲಿದ್ದು ಒಣಗಿದಾಗ ಕೆಂಪು ಬೀಜಗಳನ್ನು ಹೊಂದಿರುತ್ತದೆ.

ತೊಗಟೆ

ಚಳಿಗಾಲದ ಅಂತ್ಯ ಅಥವಾ ಬೇಸಿಗೆಯ ಪ್ರಾರಂಭದಲ್ಲಿ ಎಲೆಗಳು ಉದುರುತ್ತವೆ. ಇದೆ ಸಮಯದಲ್ಲಿ ಹೂಗಳು ಸಹ ಅರಳುತ್ತವೆ. ಮೇ ಇಂದ ಜುಲೈವರೆಗು ಕಾಯಿಗಳನ್ನು ಹೊಂದುತ್ತವೆ.


ಮಂದಾರ ಪುಷ್ಪ ಅನೇಕ ಪಕ್ಷಿಗಳನ್ನು ಮತ್ತು ಕೀಟಗಳನ್ನು ಆಕರ್ಷಿಸುತ್ತದೆ. ಹೀಗಾಗಿ ಇವುಗಳ ಇರುವಿಕೆ ಪರಿಸರದ ಸ್ವಸ್ಥತೆಯನ್ನು ಹೆಚ್ಚಿಸುತ್ತದೆ. ಇದರಿಂದ ರೈತರಿಗು ಪ್ರಯೋಜನವಾಗುತ್ತದೆ. ಇದರ ಎಲೆಯನ್ನು ಮೇವಿಗಾಗಿ ಸಹ ಬಳಸಬಹುದು. ಇದು ದೇಶೀಯ ಮರವಾದ್ದರಿಂದ ಅನೇಕ ದೇಶೀಯ ವೈದ್ಯ ಪದ್ಧತಿಯಲ್ಲು ಇದರ ಬಳಕೆಯುಂಟು.